NEWROZ 2010 li Hollanda bajarê Arnhem tê pîrozkirin

Ji bona neteweya Kurd, ji bona gelên Rojhilatanavîn  Newroz di gelek waran de cejnek pîroz e!  

Ev pîrozbayî  ji kevneşopîya dîrokê virde bû 2710  salin ku didome.  Bê guman ji bona rojek weha  di dirêjayîya dîrokê de  karibe pîrozbayîya xwe bidomîne gereke azmûnên  wê yên girîng û bingehîn hebin. 

Jiber ku NEWROZ xwedîyê ewçend azmûnên bingehîne ku karibuye hebûna xwe, pîrozbayîya xwe bêyî ku ji girîngîya xwe tiştek hunda bike heta roja me bidomîne. Em livir tenê van çend  egeran bînin ziman wê di warê  mezinahî û pîrozbûyînîya wê de balek bide me;

Di warê xwezayîyê de;  21 Adarê de dirêjayîya şev û rojê wek hev e, lê ji wê û şûnda roj û ronahî ber dirêjîyê û şev û tarîtî jî ber bi kinbûnê ve diçin! Demên tengasî û tunebûnîyên zivistanê li paş dimînin, rojên firebûnî û xweşîyê destpêdikin. Her weha ev dibe destpêka salek nû, û NEWROZ dibe Sersala Kurdî jî!

Di warê olî de; li gor kevneşopîya Rojhilata navîn û bi taybetî gelê Arî û her weha Îranî arperestbûn. Di ola Zerdeştî de agir mînaka paqijkirina gunehan e û pîroz e!  Nîşanên vê pîrozîyê hêna jî dinav gelê Kurd de gelekin. Her weha di efsaneya Newrozê de jî agir nîşana komunîkasyon û têkilîyê ye. Gava agir li ser qesra Dehaqê hov tê pêxistin ev nîşana serketin û azadîya ji zordarî û hovîtîya Dehaq wek mizgînîdayinê li deverên bilind yên welat bi hilkirina agiran ve di şevek de tevahîya welat bi vê mizgînîya pîroz ya azadîyê ve tê hesandin! Jiber vê jî agir dibe beşek girîng û bingehîn ya Newroza pîroz!

Her weha mixabin cografya (erdnîgarîya) welatê me rêdaye ku ji her deveran ve êrîşên bê hempa  bi ser welatê me de werin û welatê me di demajoya dîrokê de tim bûye qada şer û bihevçûnan. Gelek caran welatê me ji alîyê dijminên hov ve hatîye dagirkirin, talan û wêran kirin. Niha jî bêyî  Kurdistana Başûr (ew jî tenê beşek jê) welatê me Kurdistan dibin zordarî û hovîtîya dijminan de dinale. Her roj qîz û kurên me tên girtin, îşkence kirin û daliqandin. Welatê me hêjî tê talankirin û wêrankirin! Hêjî zarokên me nikarin bi zimanê xwe yî xwezayî perwerdeyî bibînin! Em Kurd nikarin zimanê xwe di jîyanê de bi hawekî xwezayî bixebitînin! Hêjî welatê me perçekirî, parvekirî dibin darê zordar û hovên mêtinkarên Surîyê, Tirkîyê û Îran de dijî. Bi hindikayî nîvê Kurdistana Başûr jî her roj ji ber hovên Ereban bi dehan gorî didin axa Kurdistanê û di nav tirs û lerza dijminan de dijîn!  Vê rewşa hovane tim  hest û daxwaz û hêvîya azadî û serxwebûnê, dinav gelê Kurd de jîndar hîştîye! Her weha vê hovîtî û zordarîyê kîna li dijê mêtinkarên rojane tim şîyar hîştîye!  Ev jî egerek girîng e ku; wê hesta  Newrozê ya pîrozbayîya azadî û serxwebûnê, hesta Newrozê ya  ji zordarî û hovîtîya Dehaqan rizgarbûnê tim geş hîştîye!

Newrozê ewçend jîyana Kurdan ya rojane de bûye xwedîyê bandorek mezin ku seranserê  Adarê bûye çavdêrê xweşî û nexweşîyên me. Gelek bûyerên dîrokî yên girîng çi yên xweşî, kêf û şayî, her çi dilşikestinî xwîn û hêş û girî di vê mehê de gihîştine hev, ketine navahev û bûne perçeyek ji jîyana neteweya Kurd. Ev bi serê xwe jî hîştiye ku Newroz û Adar bibe perçeyek ji jîyana Kurdistanîyan. Ew pêre bijîn, him bi xweşîyan him bi nexweşîyan, him bi kêf û şayîyan him bi şîn û girîyan. Ew nikarin bê Newrozê bijîn!

Gelî beşdaran, em dubare dibêjin: Bira cejna we ya Neteweyî, cejna azadî û serxwebûnê, cejna hêvîyê xweş û geş yê pêşerojê, li we, li tevayîya gelên Kurdistanê, li gelên Rojhilata navîn û hemî bindestan pîroz be! Serşorî, rûxandin, pelçiqandin û mirin tim para Dehaqên  rojane, yanê  para zordar û hovan be!